1Sa 8 | MEU | STEP | Samuel na e buruka, bena ia ese natuna mamaruanedia e abidia, Israel edia hahemaoro taudia ai e halaodia.

1 Samuel 8

Israel ese pavapava e gwauraia

1 Samuel na e buruka, bena ia ese natuna mamaruanedia e abidia, Israel edia hahemaoro taudia ai e halaodia. 2 Natuna roboana ladana na Ioel; ihararuana ladana na Abia. Raruosi na hahemaoro taudia Bere-sieba ai. 3 A idia na tamadia ena dala ai asie raka; moni iabina totona e raka siri. Idia na hahemaoro e hagagevaia, bona ihagagevana davana e abia.

4 Bena Israel tau-badadia iboudiai e hebou, Samuel dekena ela, Rama ai. 5 E hereva henia, eto, O itaia, oi na vada o buruka, bona natumu na oiemu dala ai asie rakamu; taunabunai, emai pavapava ta bavabia hidi, baine halohiamai, bese iboudiai e karamu heḡereḡeredia. 6 A edia hereva, eto “Pavapava ta ba henimai, baine halohiamai”, na Samuel ese e badulaia. Bena Samuel ese Iehova e ḡuria.

7 Iehova ese Samuel e hamaoroa, eto, Ene taunimanima edia hereva iboudiai bavabi dae; badina be oi asie dadaraimumu, a lau hari e dadaraigumu; asie uramu bae abigu, edia pavapava. 8 Edia kara iboudiai lau e kara heniguva, Aigupto amo na hakaudia lasi dinana amo ema bona hari dina, na lau vada e dadaraigu bona dirava idaudia isiaidia vada e lao heni; oi danu unu e karamu tomamu. 9 Taunabunai, harihari edia hereva bavabia dae, ḡau tamona, hereva aukadia amo ba sisiba henidia guna; ba hadibalaidia, edia pavapava, baine halohiadia tauna, na ede baine karadia toma.

10 Taunabunai, Samuel ese hari pavapava e noilaia taudia na Iehova ena hereva iboudiai e hamaorolaidia. 11 Ia na eto, Emui pavapava, baine halohiamui tauna, na ini baine kara toma: natumui mamaruanedia baine abidia, ena kariota taudia bona ena hosi-gui taudia bona ena kariota vairadiai bae heau taudia ai baine halaodia. 12 Daha lohiadia bona imahui lohiadia baine duanaidia. Haida be ena tano iruana bona ena uma anidia iutudia baine siaidia; ma haida ena tuari kohudia bona ena kariota kohudia ikaradia baine siaidia. 13 Natumui hahinedia danu baine abidia, muramura mai bonadia ikaradia bona aniani inaduna bona flaoa igabuna hahinedia ai baine halaodia. 14 Emui uma bona emui vine imeadia bona emui olive imeadia namo-hereadia baine abidia, ena hesiai taudia baine henidia. 15 Emui uma anidia bona emui vine anidia baine karoadia, karoa gwauta, bena karoa ta baine abia, ena ruma ireḡuna taudia bona ena hesiai taudia baine henidia. 16 Emui hesiai taudia bona emui hesiai hahinedia bona emui boromakau bona emui doniki namo-hereadia ia ese baine abidia, iena ḡaukara bae kara. 17 Emui seri baine karoadia, karoa gwauta, bena karoa ta baine abia iena. Baine ḡuimui, ena hesiai ai baine halaomui. 18 Una dina ai umui na ba tai lolololo, emui pavapava, sibomui o abia hidi tauna, dainai. A Iehova na basine haere henimui una dina ai.

19 A hebou taudia na e gwau edeede, Samuel erena asie kamonai. Idia eto, Lasi! Ai na a uramu pavapava ta ese baine halohiamai: 20 unu amo bese iboudiai heḡereḡeredia ai baia noho, emai pavapava ese baine halohiamai, bona vairamai ai baine raka lasi, emai tuari ai baine gunalairnai.

21 Samuel ese hebou taudia edia hereva iboudiai e kamonai, bena ia ese Iehova vairanai ma e gwaurai. 22 Bena Iehova ese Samuel e hamaoroa, eto, Edia hereva bavabia dae, edia pavapava ta ba henidia. Bena Samuel ese Israel taudia e haduadia, eto, Ta ta ena hanua ena hanua baola.